తమిళనాట ఉత్కంఠ.. గవర్నర్‌తో మరోసారి విజయ్ భేటీ.. బలనిరూపణకు సిద్ధం!

తమిళనాడు రాజకీయాలు ఉత్కంఠభరితంగా మారాయి. గత నెల జరిగిన అసెంబ్లీ ఎన్నికల్లో అతిపెద్ద పార్టీగా అవతరించినప్పటికీ, ప్రభుత్వ ఏర్పాటుకు అవసరమైన పూర్తి మెజారిటీపై నెలకొన్న సందిగ్ధత నడుమ నటుడు విజయ్ తన ప్రయత్నాలను ముమ్మరం చేశారు. తన తమిళగ వెట్రి కళగం (టీవీకే) పార్టీకి సంఖ్యాబలం ఉందని నిరూపించుకునేందుకు ఆయన గురువారం ఉదయం గవర్నర్ ఆర్వీ అర్లేకర్‌తో మరోసారి సమావేశమయ్యారు. సభలో తన బలాన్ని నిరూపించుకోవడానికి సిద్ధంగా ఉన్నానని, ఈ మేరకు గవర్నర్‌కు స్పష్టం చేసినట్లు తెలుస్తోంది.

బుధవారం గవర్నర్‌తో జరిపిన తొలి భేటీ విఫలమైన సంగతి తెలిసిందే. విజయ్ నేతృత్వంలోని కూటమికి పూర్తిస్థాయి మెజారిటీపై గవర్నర్ సందేహాలు వ్యక్తం చేయడంతో ముఖ్యమంత్రిగా విజయ్ ప్రమాణస్వీకారం వాయిదా పడింది. ఈ నేపథ్యంలో ప్రభుత్వ ఏర్పాటుకు అవసరమైన మ్యాజిక్ ఫిగర్ 118కి మరో 5 సీట్లు అవసరం కావడంతో మద్దతు కూడగట్టే పనిలో టీవీకే నిమగ్నమైంది. కాంగ్రెస్ పార్టీకి చెందిన 5 సీట్లతో కలిపి కూటమి బలం ప్రస్తుతం 113గా ఉంది.

ఈ క్రమంలో చిన్న పార్టీల మద్దతును కూడగట్టడంపై విజయ్ దృష్టి సారించారు. డీఎంకే మిత్రపక్షమైన వీసీకేకు 2, వామపక్షాలైన సీపీఐ, సీపీఎంలకు కలిపి 4 సీట్లు ఉన్నాయి. ఈ పార్టీలతో టీవీకే సంప్రదింపులు జరుపుతోంది. వీరి మద్దతు లభించి, కాంగ్రెస్ తన వైఖరికి కట్టుబడి ఉంటే, కూటమి బలం 119కి చేరుకుంటుంది. ఇది మెజారిటీ మార్కు కంటే ఒకటి ఎక్కువ. అప్పుడు ప్రభుత్వ ఏర్పాటుకు విజయ్‌ను గవర్నర్ ఆహ్వానించే అవకాశం ఉంటుంది. వామపక్షాలు తమ నిర్ణయాన్ని ఈరోజు సాయంత్రం వెల్లడించనున్నాయి.

మరోవైపు, టీవీకే, ఏఐఏడీఎంకే మధ్య పొత్తు కుదరవచ్చనే ఊహాగానాలు వినిపించినప్పటికీ, అవి దాదాపు అసాధ్యంగానే కనిపిస్తున్నాయి. తన ప్రత్యర్థి అయిన విజయ్‌కు మద్దతిచ్చే ప్రసక్తే లేదని ఏఐఏడీఎంకే అధినేత ఎడప్పాడి పళనిస్వామి స్పష్టం చేసినట్లు ఎన్డీటీవీ తన కథనంలో పేర్కొంది. ఒకవేళ గవర్నర్ రెండోసారి కూడా ప్రభుత్వ ఏర్పాటుకు అవకాశం ఇవ్వకపోతే, న్యాయపరమైన మార్గాలను అనుసరించేందుకు కూడా టీవీకే సిద్ధంగా ఉన్నట్లు సమాచారం. దీంతో తమిళ రాజకీయాలు మరింత ఆసక్తికరంగా మారాయి.